تقريبا اى كلام
مين السبب فى فشل الثورة ؟
أولا :
أنا مش ثورى ولا وطنى ولا ناشط ولا كاتب ولا بانتمى لأى حزب سياسى و لا بافهم فى السياسة اصلا و كويس او انى بأكتب عربى.
ثانيا :
لو مستغرب من عنوان “البتاعة” دى و بقول فى سرك “ثورة أيه” أو “الثورة مفشلتش” يبقى انت او انتى اهبل او هبلة و ارجوك أو ارجوكى كفاية كده و اقفلوا الصفحة و متكملوش قراية او قرائة.
نبدأ بشوية كلام حمضان كلنا بنقوله و مصدقينه بس مش كلنا بنفكر فيه بجد ولا حاسين بيه.
فاكرين أيام الثورة ؟!!
لما كان مفيش حاجة اسمها مسلم و مسيحى ؟!
لما كان مفيش حاجة اسمها راجل و ست ؟!
لما كان مفيش حاجة اسمها كبير و صغير ؟!
لما كان مفيش حاجة اسمها غنى و فقير ؟!
لما كان مفيش حاجة اسمها متعلم و جاهل ؟!
كلنا عارفين الكلام ده كويس و قلنا و عيدنا و زيدنا فيه, يا فرحة أمى و أمكوا بيكوا, بص لنفسك و شوف انت بتعمل ايه من اللى كان بيتعمل ايام الثورة و لو مكنتش نزلت, عادى انت مش ابن مره ولا اسرائيلى يعنى, شوف كنت بتعمل ايه ايام اللجان الشعبية, كان نفس الكلام بيحصل بس لو منزلتش فى اى ميدان ولا نزلت فى اللجان الشعبية, تقريبا تبقى ابن مره, لا بهزر والله, عادى مش هقولك كنبة ولا فلول بس ابقى اسأل حد من صحابك من اللى جتلهم الفرصة يبقوا بنى أدمين بجد لأول مرة و تقريبا كانت اخر مرة.
المهم, مفيش ولا ايادى خفية ولا صوابع مستخبية و اكيد ده بقى باين اوى, الحمار بس اللى مش واخد باله, الغلط مننا بس مش بسببنا و انا معنديش حل و مافتكرش ان فيه حل ف لو زهقت و احبط اقفل الصفحة برضو. مبارك هو السبب فى كل اللى بيحصلى من اول يوم فى الثورة لحد النهاردة و لغاية بتاع 20 او 30 سنة كمان.
الشرطة اللى ضربتنا و قتلتنا فى الميدان مش ذنبهم, ده ذنب مبارك الكلب اللى برمج عقولهم و غير اخلاقهم.
البلطجية اللى كانوا بينزلو الميدان و الشوارع يقتلوا و يسرقوا مش ذنبهم, ده ذنب الكلب اللى جوعهم و حرمهم من التعليم و نساهم الصح من الغلط و خلى كل همهم الفلوس عشان ياكلوا.
الحرامية اللى بيسرقوا الكيا سيراتوا و غيرها و بيسبتوا الناس فى الشوارع مش ذنبهم برضوا, ده ذنب الكلب اللى حرمهم من التعليم و خلاهم فيروس فى المجتمع.
الاخوان اللى عمالين يفسوا فى مجلس الشعب و غيره مش ذنبهم, ده ذنب الكلب اللى رماهم فى السجون و عذبهم ونساهم السياسة و مسح عقولهم.
الاقباط اللى رشحوا شفيق مش ذنبهم, ذنب الكلب اللى خوفهم من المسلمين و علمهم ان المسلمين هيعذبوهم و ذنب معظم رموز الاسلام اللى خوفتهم بعد الثورة, و الرموز دى برضه مش ذنبها.
المسلمين اللى رشحوا مرسى و الاخوان, عشان خايفين من اى حد تانى و بيقولوا اهم بتوع ربنا و بدقون اكيد مش هيسرقونا, مش ذنبهم.
سواق الميكروباص الحمار اللى انا عن نفسى مش بطيقوا, مش ذنبه انه اتولد فقير و عاش جاهل و بيجرى بسرعة و يخبط عشان يلحق يعمله كام عجلة فى اليوم.
سواق التاكسى اللى عامل زى تاجر الخضار و بيفاصل فى الاجرة مش ذنبه.
الشحاتين, الزبالين (الشحاتين), عسكرى المرور اللى بياخد رشوة, العربجى اللى بيمشى عكسى, اللى بيتحرش فى الشوارع و سواق التوك توك, كل دول مش ذنبهم.
الحمير اللى زى و زيك اللى طول النهار يكتبوا كده و يفتوا فى السياسة, مش ذنبهم انهم عاشوا محرومين من السياسة.
الكلب اللى هو مبارك, اللى عيش الناس فى فقر و جوع و جهل و ذل, اللى قضى على اجيال كتير, اللى خلانا نضرب بعض فى ماتشات الكورة, اللى خلانا مش عارفين نقول نعم و لا لأ فى الاستفتاء الدستورى ( اللى اصلا اتلغى ) , اللى خلانا نحب المجلس العسكرى عشان فاكرينه الجيش ( حتى لو هو الجيش, ان شاء الله يولع ) , اللى خلانا نغلى الاكل و الشرب على بعض, اللى خلانا نسرق و ننصب على بعض, اللى خلانا نولع فى الكنائس و المساجد, اللى خلانا نعمل حجات كتير مش المفروض انها تتعمل.
لو فاكر ان البلد مشكلتها الفلول او الاصابع الخفية تبقى عبيط, البلد مشكلتها فقر و جهل شعبها. عشان كده مش لاقين حد كويس يبقى رئيس, عشان كده الناس انتخبت مرسى و شفيق.
يعنى ايه حرية و ديموقراطية و تطلع اشاعة ان فيه غرامة لو منتخبتش !!
يعنى ايه حرية و احنا بنختار احسن الوحشين ؟!!!
يعنى ايه حرية و فيه ناس لسه بتتحاكم محاكمات عسكرية !!
المجلس العسكرى مامشيش ليه !! فين حق الشهداء !! فين الناس اللى فى السجون العسكرية !!
فين حق البنت اللى اتعرت فى الشارع !!
فين محاكمة مبارك و عصابته !!
فين الامن و الامان !!
فين البنزين و الغاز اللى كل شوية يقطعوهم علينا !!
البلد حصل فيها ثورة و ماتت الثورة لما المجلس العسكرى مسكها و سقفناله و قلنا الجيش و الشعب ايد واحدة, مفيش اى حاجة اتغيرت و ماتقوليش استنى و كله هيتغير, مفيش اى حاجة هتتغير.
مرسى لو مسك الناس مش هتسكت و لو شفيق مسك الناس مش هتسكت.
و بعدين هو لما اى حد يبقى رئيس, تفتكروا هيعل ايه فى المحاكمات اللى عفنت فى المحاكم ؟!
تفتكروا هيعمل ايه مع المجلس العسكرى !!
كفاية بقى عشان انا اتخنقت و مش هراجع اللى كتبته اصلا هارزعوا كده و خلاص, بلا كتابة بلا كلام بلا ثورة بلا مصر.
The everlasting struggle.
Dumbledore analysis.
The horny B letter.
Photoception.
Photo set 2.
Photo set 1.
The never again Michael Jackson.
Hazem Salah Abo Ismail for presidency. Posters everywhere.
Metal head ?! No !!
